大小姐，大少爺都好鍾意食咖哩，但大小姐又怕辣，大少爺又鍾意辣，所以我就用咗日式咖哩磚再加小小中式咖哩粉，噤就可以滿足到佢地2個人嘅要求喇，我仲發現咗一樣野，就係用飯煲”煲粥”功能炆牛腩，比用鑊更加易淋，更加入味~~~
《日式咖哩牛腩》食譜
材料:
牛腩或牛肋條 1.5斤
薯仔 2個
甘筍 1條 (我冇落，寶貝唔like)
日式咖哩磚 2磚
中式咖哩粉 小許
蒜頭 適量 (我會用一個)
薑片 2-3片
做法:
(1) 牛腩切大大件，洗淨，汆水，備用。
(2) 用少許油爆薑片、蒜頭，再加入牛腩炒至金黃後，加少許生抽，老抽拌勻。
(3) 倒入清水蓋過牛腩面，大滾後收慢火炆1小時 (如用飯煲”煲粥”功能, 按制後等自動跳制便可) ， 再焗1小時。
(4) 最後加入薯仔及甘筍，再炆至薯仔淋， 最後加入咖哩磚及咖哩粉煮至杰身，即成。
溫馨提示 :
日式咖哩磚會愈煮愈杰， 煮時要不時攪拌，以防痴底，若太杰可加少許水。